Simple! Subalit naging masaya ang dalawang araw na isinagawang pagdiriwang ng ika-43 taong Anibersaryo nang pagkakatatag sa bayan ng Gloria, noong ika – 30 ng Setyembre hangang ika-1 ng Oktubre.

Naging bahagi ang bawat mamamayan sa nasabing pagdiriwang ng inilunsad ang Mayor’s Cup 2007 Sports Tournament. Nagpamalas ng lakas, liksi at galing ang mga manlalalarong kalahok sa mga larong basketball, Volleyball (Men & Women), Softball at Boxing, na pinakatampok sa lahat sa lahat ng palakasan.


AKSIYON!
Maaksiyon ang naging tunggalian ng mga koponan sa bawat laro na naghatid nang kagalakan sa mga manonood mula sa iba’t-ibang lugar at mga barangay. Ang sigawan, kantiyawan at tawanan ng mga manonood ang lalong nagbigay kulay at buhay sa nasabing pagdiriwang. Dagdag pa dito ang paminsan-minsang pakuwela ng mga manlalaro sa mga hindi inaasahang bloopers sa pagpasa, pagsalo at pade-dribble ng bola. Hindi man naiwasan ang pagkakasakitan sa pagitan ng mga players dahil sa pisikal na paglalaro, napatunayan naman ang diwa ng “brotherhood.” Nang matapos na ang palakasan ay sinaraduhan na rin ang mumunting di pagkakaunawaan ng mga manlalaro at mga tagasuportang kabarangay sa bawat koponan  

Nagtapos ang mga palaro sa championship games noong ika-1 ng Oktubre 2007.


BARANGAY NIGHT:
Mula sa iba’t-ibang barangay na sakop ng Gloria, muling ipinakita ng bawat Gloriano ang kanilang pakikipagkaisa sa tagumpay ng okasyon. Nakipagdaupang palad ang mga Pinuno ng Barangay, kasama ang kani-kanilang opisyales at nasasakupan kay Punong Bayan Romeo D. Alvarez. Personal namang nagpasalamat si Mayor Alvarez,  sa ginawang pagkikipagkaisa ng mga pinuno ng barangay upang matagumpay na maisagawa ang palatuntunan ng Pamahalaang Bayan sa pagdiriwang ng pagkakatatag ng Gloria.

Sinabi ni Mayor Alvarez sa kaniyang Inspirational Speech na patuloy siyang gagawa para sa kapakanan ng bawat mamamayan. Nagpasalamat din siya sa lahat ng Sangguniang Bayan Members sa pangunguna ni Vice Mayor Loreto S. Perez at Konsehal George Voltaire Alvarez, sa walang sawa nitong pagsuporta sa kaniyang pamumuno sa ating bayan. Naging panauhin din sa  Barangay Night si Atty. Rey Umali, Deputy Commissioner ng Bureau Of Custom, na naging pangunahing isponsor sa palarong boxing.

Ang kasiyahan ay ipinagpatuloy sa pamamagitan ng sayawan na nilahukan ng mga  opisyales ng bayan, opisyales ng barangay, mga empleyado ng Pamahalaang Bayan at mamamayan.