Malaking bagay na magkaroon ng sariling palengke ang ating bayan. Maaaring hindi pa natin nakikita ang magiging resulta nito sa kasalukuyan. Pero, kung pagtutuunan natin ng pansin, mas magdudulot itong malaking pagbabago sa atin, hindi lamang sa ating bayan. Una, maaring makatipid na tayo sa pamasahe lalo na kung sa bayan ka ng Pinamalayan namimili. Pangalawa, mas may potensiyal ng makilala ang mga produktong gawa sa ating bayan at magbubukas ito para sa malaking produksiyon. Pangatlo, ang paglaki ng produksiyon ay mangangailangan ng mangagawa upang matugunan ang production demand. Mayroon ng trabaho. Pangapat, ang pagkaroon ng trabaho ay mag-aangat sa ating pamumuhay at Panlima, may pagkakataon na tayong paunlarin ang ating sarili mula sa ating kinikita. Dito pumapasok ang maayos na pamumuhay, natutugunan ang mga pa- ngangailangan ng isang pamilya, tulad ng bahay, pagkain at damit. Ang edukasyon at kalusugan ang lundo ng lahat. Kung may sapat na trabaho maaabot din natin ang de kalidad na edukasyon lalo na para sa ating mahihirap. Isipin na lang natin ang maaabot natin bilang isang bayan kung lahat ng populasyon ng Gloria ay aral at marunong! Bagamat ang edukasyon at kalusugan ang ilan sa mga programang isinusulong ng pamahalaang bayan, ang maraming basiko at mahahalagang serbisyo ay madali ng maibibigay sa atin kung katulong tayong aabutin ang mga bagay na ito. Ang pagbubukas ng pamilihang bayan ay hindi lamang nakasentro sa pagbebenta at pamimili ng mga kalakal. Mas may malaki itong epekto sa kabuuang aspeto ng ating bayan kung ito ay ating tatangkilikin, dahil ang pag-ulad nito ay nasa ating pagsuporta.