Calapan City, Or. Mindoro – Nakopo ng bayan ng Gloria ang pang-apat na puwesto sa katatapos na 4th ACP/SK Cup Inter Town Basketball League Tournament na binuksan sa bayan ng Naujan, Mayo 4. Mula sa anim na koponan – Calapan City, Gloria, Naujan, Puerto Galera, Victoria at San Teodoro, nagpakita ang bawat manlalalaro ng galing, liksi at teknik sa paglalaro ng basketball. Binubuo ang koponan ng Gloria ng 13 manlalaro na nagbuhat sa iba’t-ibang barangay ng bayan ng Gloria. Nagpakitang gilas sa loob ng court sina Bong Rexelle Aporo, Rodel Baygan, Jeuz Jhazeel Cay, Arnold De Belen, Steve Rupert Historillo, Jason Jarabe, Jimbo Lamboloto, Robert Morales, Chris Onte, Khanafsar Ortega, Jomar Quintana, Varian Sagaral at Gilbert Raza. Si Bb. Maricel Aquino ang muse ng koponan. Nanguna sa palakasan ang Calapan. Nakuha ng Naujan ang ika-2 puwesto at pumangatlo ang Puerto Galera. Masigasig na pinamahalaan nina G. Seigfred Arriola, Oner Garcia at Brgy. Councilor Amante Sadicon ang strategic moves at defense ng koponan, kasama din si Brgy. Councilor Albert Mantaring. Matiyaga namang pinamunuan at sinubaybayan ni SB Member George Voltaire P. Alvarez ang mga manlalaro. Pinarangalan ang Mytical Five na sina MVP Marvin Mendoza at Jedd Eje ng Calapan, Raymondo Bunuin at Jerald Atienza ng Puerto Galera at ang tinaguriang “strong man” Rodel S. Baygan ng Brgy. Alma Villa, Gloria. Ito ay bilang pagpupugay at pagsaludo sa ipinamalas nilang talento sa larangan ng basketball. Ito ang naging bunga ng maagap pagtugon ni SKMF President Jenny Joy Vicky P. Alvarez sa paanyaya ni SKPF Myrra Khrisma Normina F. Mendoza para lumahok sa nasabing palakasan. Ang lahat ng pinansyal na pangangailangan ng koponan ay sinagot ng Pamahalaang Bayan sa pangunguna ni Mayor Romeo D. Alvarez. Layunin nitong magsama-sama, magkaisa at malinang ang talento ng mga kabataang Mindoreño sa larangan ng palakasaan.