Hindi nabago sa inyo ang pitak ng inyong lingkod. Tuwing ikatlong buwan, kasama ninyo ako sa pagtitilad ng samu’t-saring usapin sa ating bayan. Bawat araw hinahapag natin ang mga programang tutugon sa pangangailangan ng ating mamamayan. Ako ay nagpapasalamat sampu ng Sangguniang Bayan at patuloy ninyong pinagkatiwalaan ang aking pangunguna sa ating bayan.
    Gusto natin ang mga programang nakabatay sa konkretong kalagayan at pangangailangan ng mamamayang Gloriano. Maganda itong sukatan ng kaunlaran para sa ating lahat. Kaya nga ang suporta ng inyong lingkod sa pagsasagawa ng Community-Based Monitoring System (CBMS) Survey sa mga barangay sa ating bayan ay agad kong ibinigay. Hindi ba’t ang higit na mainam na impormasyon ay galing mismo sa ating mga kabarangay. Ang barometro ng ating mga programa ay sa kanila magmumula. Maaring natatanaw natin ang ating mga kabarangay subalit hindi natin nakikita ang mas malalim pang pinag-uugatan ng ilang mga problema para maisulong ang patuloy na pag-unlad na ating inaadhika. Sana, pagkatapos ng mga sarbey at pag-aayos ng mga datus na nasinop ay makatulong ito sa lahat ng aspetong kailangan para sa pag-angat ng ating pamayanan.
    Lahat ng ating inisyatiba ay may magandang resulta. Sa pagdiriwang ng ika-110 na kalayaan ng ating bansa, naging panauhin natin ang mga pangunahing opisyal ng tanggapan ng DENR at LRA. Napagkalooban ng 72 titulo ang mga kababayan nating nagmula ang pamilya sa Mirayan, Malubay at Manguyang. Ito ay lupang kaloob ng nasyunal na pamahalaan para ganap na maging pag-aari ng mga recipients ang lupang kanilang tirahan sa matagal ng panahon. Inaasahan ko na mapayapang makakapamuhay ang mga pamilyang ito at malilinang o magamit ang natanggap na lupa sa tamang paraan at makatutulong ito ng malaki sa kani-kanilang pamilya. Mahaba pang panahon ang dapat na gugulin sa para sa ganap na pag-unlad ng ating bayan, unti-unti pa lamang natin itong nakakamtan, bagama’t malaki na ang ipinagbago ng bayan ng Gloria sa anyo at kalagayan nito mula noon. Hanggat naririto ako dahil sa inyong pagtitiwala, mangunguna ako sa inyong lahat para sa lalong ikatatatag ng ating bayan.