Ang baybaying dagat ng barangay Agsalin ay isa sa maipagmamalaking lugar ng Gloria. Dito matatagpuan ang Marine Protected Areas na may lawak na 36.5 ektarya at nagtataglay ng masaganang biyaya ng yamang dagat. Nanomina bilang outstanding Marine Protected Areas Finalist sa buong Pilipinas noong 2007, dahil sa mataas na pagpapahalaga ng pamahalaang bayan at mga mamamayan ng Agsalin na protektahan ang sanktuaryo na tirahan ng iba’t-ibang yamang dagat.
    Mula sa 826 nitong papulasyon, ang barangay Agsalin ang isa sa may mayamang lupain na nilinang ng mga naninirahan dito. Hindi man nakasulat sa karatula ang bawal ang tamad, naging panuntunan na ng mga mamamayan dito ang maging abala sa araw-araw, para kumita at mamuhay ng desinte at maayos.
    Dati ang Agsalin ay kilala sa “Nagsalin” na ang ibig sabihin ay nagsalin o nagsama ang dalawang ilog,ang Agsalin River at ang maliit na ilog na sakop ng Brgy Pag-Asa o Potpot River. Noong Oktubre 2, 1964 sa bisa ng proklamasyon ni dating Pangulong Diosdado Macapagal, kasabay ng pagkakahiwalay ng bayan ng Gloria sa bayan ng Pinamalayan, ito ay naideklarang Brgy. Agsalin.
    Noon lamang 2007, nadebelop ang tubigan o taniman ng palay dahil sa irigasyon na naipatayo ng DAR, NIA, MARO at Pamahalaang Bayan ng Gloria sa pakikipag-ugnayan ni Punong Bayan Romeo D. Alvarez sa mga ahensyang nabanggit, para sa pagsasaka ng barangay Banus, Agsalin at katabi nitong barangay Pag-asa na sakop ng bayan ng Bansud. Ang pagtatanim ng palay, saging, gulayan, pangingisda, pagkokopra at pag-aalaga ng mga hayop ang mga pinagkakakitaan ng 55% ng mga mamayan dito. Umaabot naman sa 5% ang nasa ibang bansa at 40% ang natatrabaho sa ibang lugar tulad ng Metro Manila, Laguna, Batangas at iba pang lugar sa Pilipinas
    Ayon sa mga opisyales na nakapanayam ng Gloria Ngayon, kahit na may mga pangunahing gusaling nakatayo na sa kanilang brgy, tulad ng brgy hall, pamilihang barangay, day care center at health center, patuloy pa rin silang nagpaplano para maisaayos ang mga gusaling may mga kasiraan na.
    Nakalinya sa mga proyekto ng barangay ang brgy. hall na planong lagyan ang second floor. Kulang ang espasyo nito para makapaglagay ng mga kailangan cabinet sa pagsisinop ng kaukulang papeles at para sa privacy ng ilang maseselang usapin sa barangay.Ang stage, pamilihang barangay, pagsasaayos ng farm to market road na nasa boundary ng Maragooc at Agsalin at ang pagbubukas ng daan sa purok Dahlia patungong brgy. Pag-Asa Bansud, ay may malaking maitutulong para sa mga nagluluwas ng kopra, saging at iba pang mga produkto na nagmumula sa sitiong ito.     Dahil dito, masikap na ipinafollow-up ng mga opisyales ng barangay ang resolusyon na naipasa na sa mga opisyal ng ating lalawigan at pamahalaang bayan at naghihintay ng pagkakataon para mabigyan ng pondo na matugunan ang kakulangan ng kanilang barangay.
    Mula naman sa IRA at 20% Development Fund (DF) at tulong ng 10% SK Fund, natatanglawan ang kanilang pamayanan ng 13 street lights, ang solar dryer na nagagamit ng mga taga barangay para sa pagtutuyo ng palay, na may kaukulang 1 pisong butaw kapag umabot ng 10 sakong palay ang ibibilad, ang 5 waiting shed, barangay out post at culvert. Ang spiel way, patrol boat at guard house ay bahagi ang barangay sa labor nito, bagamat ang pondo sa pagpapatayo ay nagmula sa pamahalaang panlalawigan at bayan.
    Sinusuportahan din ng barangay at pamahalang bayan sa pamamagitan ng Municipal Social Welfare and Development Office (MSWDO) ang Day Care Center, gayundin ang mababang paaralan mula grade 1 hanggang grade six sa pakikipagtulungan ng DECS-Gloria District.
    Ang barangay ng Agsalin ay isa sa pinakamatahimik na barangay. Walang malaking krimen na nagaganap maliban sa maliliit na sigalut na agad na naisasaayos sa barangay. Ang mga tanod ng barangay sa pangunguna ni CBP Danilo Vitto ay patuloy na sinusuportahan ang katahimikan at kapayapaan ng pamayanan.  

 

KARANGALAN NG BARANGAY
    Ipinagmamalaki ng mga mamamayan ng Agsalin na ilan sa kanila ay nakapag-ambag ng karangalan sa kanilang pamayanan.
    Noong Oktubre 25, 2000, tinanggap ni Gng. Elvira Lacatan ang isang akreditasyon kaugnay sa Pambansang Batas 6972 - na 4 STAR DAY CARE na nagpapaunlad sa kakayahan ng mga bata. Ipinagkaloob ni Atty. Delfie Tobias, Sholim Regional Director DSWDO sa Muntinlupa City at Outstanding Day Care Worker sa isinagawang Assessment at Evaluation ng MSWDO Melogean S. Candelario at Pamahalaang Bayan ng Gloria noong 2007.
    Naging Miss Tourism 2004 si Catherine P. Vitto sa pagdiriwang ng pagkakatatag ng Gloria at Kawayanan Festival. Naparangalan din ang Nagkakaisang Kababaihan ni Gloria sa Gloria (NKGG) na outstanding barangay Chapter ang Agsalin sa pangunguna ni Gng. Araceli A. Lopez noong 2005
    Nakamit naman ng barangay ang 1st place sa Parol Making Contest, isang patimpalak ng Pamahalaang Bayan noong 2007 at 3rd place sa booth noong 2002, Kawayanan Festival. Iginawad ni Mayor Romeo D. Alvarez ang isang bufallo. Sa kasalukuyan ay may 2 na itong anak at pinakikinabangan sa kanilang lugar.
    Higit nilang ipinagmamalaki ang pagkilalang nakamit ng Fish Sanctuary mula sa Marine Protected Areas Support Network (MSN), Nov. 26, 2007 dahil dito nila nakikitang malaki ang maiiambag nitong pag-unlad sa kanilang pamayanan.                 Nagkakaisa ang mga opisyales at mamamayan ng Agsalin sa mahigpit na pagpapatupad ng batas sa pagbabawal na mangisda sa Marine Protected Area (MPA) upang mapangalagaan ang kayamanang taglay nito. Plano din ng pamahalaang barangay na idebelop ito bilang tourist spot na maipagmamalaki sa buong mundo. Ayon kay AT/CRM-Coordinator MAgO Lydia M. Cantos, na naging presentor sa MPA Congress, Villa Resort, Ilo-ilo City hindi imposible na makilala ang Agsalin Sanctuary dahil sa kayamanan at kagandahang taglay nito. Magiging patok ito sa mga turistang mahilig sa diving, snorkeling, pagrerelaks sa floating house at iba pang mga aktibidad sa dagat.
    Umaasa ang mga opisyales nito na ang mga plano/proyekto sa kanilang lugar ay patuloy na susuportahan ng pamahalaang bayan. Sa pangunguna ni kapitan Ricky T. Mabunga, sampu ng kaniyang mga konsehales na sina Jonathan Fajelagot, Gil Mingo, Timoteo Rey, Reynaldo Pelobello, Ernie Mesana, Edwin Mangaring at Merlinda Fampulme ay ipinaaabot nila ang kanilang pasasalamat sa punong ehekutibo sa mga ayudang ipinagkakaloob nito sa kanilang barangay. Hindi rin nila nalilimutan na pasalamatan si Gng. Lydia Cantos, sa mga pagpapagal nito sa ikauunlad ng Sanctuary at iba pang livelihood program ng kanilang pamayanan.